Ka bialnu hual hnena ka lehkhathawn
(SASRD, Nagaland University-a Mizo zirlaite'n kartina an tihchhuah 'Mangkhawh' chanchinbu-a chhuah tura ka ziah. Ka zirpui Mizo mipate thatna lai tarchhuah tumna a ni ber awm e)
Missionary hnaa ngaia min lo ngaizawng let ve
ta hlauh a nih chuan kei hi lawm avangin vawi 3 ka zuang ngei ang. Mi hian
‘Nupa’ angin min sawi lo se; ka bulah i chungchang an sawi dawn a nih paw’n ‘In
nu’ ti lova ‘I thiannu’ an tih mai hi ka beiseina a ni tlat dawn a, lung lohvah
i lak loh ngei ka beisei. Siar sing sang sawmsarih la tur emaw Hriatsanga ang a
kut hna thawk thiam a, kum phu lova puitling turah chuan min ruat suh aw. Ka
chhungte hmuh a’n ka lo inla puitling ve laklawh tawh si a, i hnen lovah chuan
pangchanna ka nei tawh dawn miah lo a nia. Chumi avang erawh chuan kan
inngaihzawnna khawvel a hrehawm lutuk turah ngai lo la. Milly-a ang em a zaidam
leh thuawih mi chu ni thei dawn lo mah ila, Hriatpuia anga mi tihlim thei nih
a, mi biangbak a thiam ang tala kan inbauh ve tum pawha be hmasa zawk tu che
nih ka tlum tlat dawn a ni. Min hrechiang chho zel ang a, ka account a ruah ve
thin zia te i hre chho vang a, chutih hunah chuan wallet thawl vanga min liam
san mai loh na’n Vla anga tawng tlem leh insum thei, hmasawn tum em em mi nih
ka tum tlat dawn a ni. Tawng tlem mi ka lo nih hnu chuan ka tawngkam bungrua te
chuan Bza sawi ni mai awma mawiin, badam tel hnawih ang zanin i thinlung a rawn
ti thlum dep dep tawh ang a. Ka hmangaihna che a nasat dawn em avang chuan
tawrh zawh loh mai hlau chuang suh aw, Bza ang mai hian a thawm a na dawn hauh
lo a nia. Ka ban phak loh pawh i hlimna a nih dawn phawt chan Muana anga infit
a, zuang sang ang maia inngailuiin ka ban tawk tawk tlat dawn a. Sawptawng nge
Basketball hi a thiam zawk ang aw, ti-a mipui an inhnial mam mam ang mai hian i
hlimna nge ka ngaihpawimawha i lawmna tih hriat tumin i rilru insual bat bat
tir hi ka tum tlat dawn a ni. “Hei hi ka thianpa chu a nia..” i chhungte leh i
thiante hnena min chhuang rilru taka i sawi theih na’n Fela anga puitlin,
zaidam leh mi zawng zawng hmuha hmasawn nih hi nitin ka tum thin dawn a ni.
Puia ang em chuan palian lo mah ila amah anga thinrim thup thiam te ka zir ang
a, ute a zah thiam dan en hian mahni indah hniam si lova ka ngai pawimawh che a
ni tih i hriat theih na’na zah der thiam che ka zir dawn asin. Mi zawng zawng
aia ka thlan i nih dawn miau avangin ka thinlung zawng zawng leh thenawmpa
thinlung tlem nen ka hmangaih che in ka vei ngut ngut dawn che a. I tan hla
phuah a zai sak hial che pawh ka tum dawn tih ka inhre reng si a. Ka aw lawi,
lai leh ka zai lai hmel chhehchhawl luattuk vanga Ruata anga tlangval titi
thiam, mi mood ti zangkhai tawk leka fiamthu thawh thiam mi i tawn loh na’n Kca
bulah zai ka zir duh hial dawnin ka hria. Ani chuan zai mai bakah kutthemthiam
min la zirtir tel thei dawn cheu. Andrew-a anga talent nei ngah leh thinrim
ngai lo mi ka ni ve lo tih i hriat chhuah hma ngei a Thawma anga u nih tlin,
rorel leh thusawi thiam mi nih ka lo tum ru char char dawn e. I lak atangin
engmah phut ka nei ve dawn lo emaw i lo ti hlauh ang e. Ka tan thingthiin
tawngtai fo thin la, chaw eia min sawm apiangin purunsen i chhawp tel ngei thin
dawn nia.
Comments
Post a Comment