Sasrd-a Mizo te kan picnic leh ta e

- September 09, 2018

Chawlhni hmasa chawhma inkhawm banah informal General Body Meeting kan nei zuai a. A hminga MSU President te lo nih ve takah chuan khawnge picnic an duh a, engtikah nge picnic tha ang tih vel zawtin an duhthlanna hriatna’n ban ka phar tir a. A tam zawk duhdan angin nimin inrinni (8.9.18) khan Shalom Resort-a picnic tur angin thu kan tithlu ta a ni.

Kar liam ta zawng khan college Fresher’s Day lawmna neiin mitin deuh thaw kan buai a. Picnic in charge tura kan ruatte Fela leh Muana te pawh hun thawl an nei thei meuh lo.

Nimin tak kha Shalom Resort a lo awl loh avangin leh sum sen tlem deuhna a ni pah e tiin kan campus thlang lama luiah kan zu picnic ta a ni.

Inhmuhkhawm mai a har thin avangin dar 9-a kim ti tawp phawt ang kan tia. Hostel-a ka awmpui Andrew-a leh Ruata te dar 8 hma deuhvin ka kaitho. Dar 9 velah innghahkhawmna hmun tura kan sawi C. V. Raman hostel kan pan. Kal pahin kan 2^nd year nau Vla ka call a, a rawn kal tep thu leh a pawlpuite Hriatpuia leh Bza te erawh an la mut thu a sawi a.

C. V. Raman kan thleng phei a. Kan MSU General Secretary ber Muana a lo la mu tlat! Hmanni deuhva a ke bilh kha a la na deuh a ni awm e. 2^nd year Zuitei chu a u Maria-i’n a sawm chhuah theih loh thu an rawn sawi a, Hriatpuia’n a nawmsam loh avanga a rawn kal theih loh thu a rawn sawi bawk a, Rintei a dam loh avang te leh Hlutei’n hostel lam a pan mek han hmuh kha chuan lunglawm a kim zan lo deuh hman a. Picnic te chu innawrluihna chi thil a ni lova, mahse, engmah sawi lawk lova thenkhatin an rawn thulh ngawt kha pawm mai a har deuh hman.

M. Sc. hmeichhe ho rualin Hriatpuia leh Bza an rawn thleng ve leh a, kan lawm tlang hle. Kan kim thap hian a nuam ber zel si a. Kan chhhuah hma hretin Fela phone tharin group photo kan la a, tumah kut ruak bik awm lovin kan theih tawk theuh kan keng a, lui lam chu kan pan ta hlawm a.

Rei vak lovah innghahna rem tak kan thleng thla a. Nula hovin chhunchaw tur an buaipui nghal mam mam a, tlangval ho thingfawmin kan phe nghal sang sang bawk a, u thenkhatte’n thuk tur an lo buaipui bawk a. Rei lovah chhunchaw kan fak a, hman sen loh thing kan fawm khawm a, thukah mei a alh hluah hluah bawk a. Kan rual deuh bawk a, awl tum bik kan awm lo bawk nen hna in min daih lo thuai mai. Chaw te kan han chhum hmin a, bai kan peih hnu chuan tuia cheng turin kan inpel zung zung a.

Kan innghahna chhak deuhvah a thuk lai ber feet 5 vel awm, zau vak lo hi chenna a lo awm a. ‘A zau vak lo’ bawk a, an hleuh pah te khan an innghawk sawk sawk maiin ka hria. A thuk deuh zawk beiseiin Hriatpuia leh Fela te’n tuichhunga inliluh meuhvin lung an thiar chhuak nghauh nghauhva.

Tui cheng thiam fal deuh te – Hriatsanga, Vla, Fela, Ruata, U Thawma, Hriatpuia, Zoi

Tui ngam ber – Zualtei

Tui chen nuam ti te – Mary, Mami (Chiki), Maria (Pi Thangi)

Spy - Mapuii, Mimi-i leh Tetei

A sirah Alvina-i nen kan lo titi a,

Picnic nuam ti ber a kan rin te – Andrew-a (Supana) leh Zdi …Engmah thup tit tet lovang.

Kan innghahna hmun thlang deuhvah hian leilet hmun chawmna’na tui kawng an khuapna hmun hi a lo awm a. Zoi, Bza leh Milly-a te nen rei vak lo kan zuk inchiah ve leh bawk a. U Thawma’n dar 3-ah chaw ei a tih avangin kan han chhova. Rei vak lo kan han thut khawmuan hnuah kan inkokhawm a, Zualtei leh Mary te an duet hnuah U Thawma’n tawngtaina neiin chaw hlui kan kil tlang ta a.

Zingah khan broiler ar lei tur zawngin kan executive member Fela a lo buai viau a ni awm e. A hmuh theih tak loh avangin kroiler ar 4 a rawn lei a. Kan ar lei te hi maw…. Kan thuk chhak chiahah, mei khu ur theihin kan lo dah rei deuhva, kan hriatchhuah meuh chuan an lo thi fel der! Ar talh dan chi khat chauh lo deuh chu a lo awm e.

Kan puar ta deuh bawk a, chhoh kala haw chu kan phur sarh ta lo hlawm khawp mai. Mahse kan kalna hmun hi ni a lut tam lova, a dai tha in a hla lo bawk a, campus kan thleng chho thuai mai. Kan haw lam hian pa pakhat leh a fanu hi dynamo ak in an rawn inkai chho ve bek bek a. An hmuhnawm dangdai hle.

Dar 6 velah hostel kan thleng a. Ka inbual phawt a, Ruata nen thingpuisen hang kan in a, ka lo muhil nghal bawrh bawrh a. Mangkhawh chanchinbu buaipui a ngaih avangin dar 9 velah ka va tho leh hram a. Zanah kan print chhuak nghal vek a, ka mut meuh chuan sawmpahnih leh a chanve a lo ri hman.

Duhthusam vek a ni e nimin kan picnic chu.

Rawn tel ve thei lo te chungah lungawilohna a awm lova, an rawn tel ve thei lo kha kan uipui zawk hle.

Chaw leh chawhmeh kan siam fuh ber tum a lo ni leh zel nen.

A thui zel… Duhtawk leh phawt teh ang.

Thlalak thenkhat chauh (Fela photography) -