#24 Tlawnghnar lamah Pu Marama nen

    

    Blog-a entry thar neih dawn apiang hian, “Kan ziak khat ta bawk a, bei chho leh tan ang aw,” tih lam hawi hian kan han tan ve ziah a. Chhunzawm hi a har em em lawi a. 

Vawiin chetchhuahna lam hi tlem ka’n dah ang e. Thiante leh chhungte lo chhiar atan. 

 

    Inter-Department football tournament kal chhoh lai a ni bawk a, ka awmna atanga hla lo te, Lena Stadium-ah zingkarah kan practice a. Kan team hi department panga lai tangkhawm kan ni na a, kan inpawh em em thung a. Practice-naah lah an inkap awl lo. Dam kim kan nei khat deuhve tih lovah chuan team tha ber pawl kan ni pha ve in kan hria. Naktuk (11.10.2022) hian game pawimawh tak, PHE department nen a khel tur kan nih avangin dar 8:30 vel thleng kan practice a. Thingpui in tur an chhawpte pawh chu kalsanin ka tlan haw nghal a. Inbual, chaw ei, insiam… Dar 9:45 velah office ka thleng thla a. Ni dang aiin ka tlai deuhva, rilru a nuam zan lo. 

 

    Thehluh tur awm ang ang te kan chinfel zawhah kan DDO theuhte jersey an siam sak chu kan DFO, Pu Damtea ka han pe ve a. Tlawnghnar lamah CAMPA plantation tlawh ka duh avangin ka awm loh lai a staff dangte thawh tur ka’n sem leh sawk sawk a. Dar 11:15 velah Zobawk lam panin bike-in ka inkhalh phei ta a. Ka u in Chawngte-a a kawl tur bike a lei chu ka lo hmang tangkai viau a ni. 

 

    Tunlai titi lar ‘Lunglei kawng chhia’ tih kha ka va tem nawn ve leh sak sak a. Kawng chhia kan hel tlang zak zak mai! Kawchhungte hi a insawh khawlo zo thei mai dawn in a hriat hial!

 

    Dar 10 vel atanga min lo nghak tawhtu Pu Marama chu dar 11:45 velah District Park-ah ka va fin a. CAMPA plantation atan a kut an lo thlakna lam chu kan pan chho nghal a. Reserved Forest chhunga kal kan ni bawk a, rin aiin ram a pik nuam daih mai. Chho hlir a kal kan ni na a, harsa lutuk lovin a chhip te pawh kan thleng mai a. Tunlai ka exer lak that ve lai ni lo se chu Pu Marama speed chu ka pha dawn lo viai viai hle mai. 

 

    A hmun hma te kan tlawh zawhah let leh lam chu thing chi hrang hrang inhrilhna’n te kan hmang a. Vawiin chu a hlawkthlak hle a ni. Hrangchalkawn-a ka chawlh fo thinna thingpui dawr a ka inhnawh puar hnuah office lam pan in ka inkhalh phei leh beuh beuh a. Hei, tlai inbual zawhah, ka inkhap fe hnuah, heti zat lek te hi ka’n pum ve leh hram a ni e. 

 

Hmuhnawm ti tawk te kan awm takin… 

Pu Marama nen

Zobawk lam kal a kan chawlh thinna thingpui dawr

Hnahthial

'Development is a necessary evil' kan ti ve mai dawn em ni? 

Tar-tiang

Theipalingkawh

Khiang

Hulhu

Thakthing

Ngiau

Khawmhma

Kan U John-a of Agri. Dept.-in pa thlalak min chah thin a

Arthladawn hmun put chhan arthladawn ni a an sawi chu

Tlang chhip atangin

Zobawk khua